Tokoni mo e Poupou ki hoʻo Tuʻunga Leleí

ʻOku mau tukupā ke tokoniʻi e kau toʻa ne ngaohikoviá ke nau maʻu e tokoni ʻoku tāú ʻi he ʻenau ngāue mo kimautolú.

Tokoni ki hoʻo Tuʻunga Leleí

ʻOku tukupā e Kau Fakatotolo Tauʻatāiná ke tauhi e tuʻunga lelei ʻanautolu kotoa pē ʻoku nau fili ke kau mai ki he ngāué ni. Ko e taha kotoa pē ʻoku kau mai ki he Fakatotoló, te ne lava ʻo kau atu ki he ʻIuniti ki hoʻo Tuʻunga Leleí pea mo ʻenau timi kuo akoʻi fakapalōfesinalé, ʻa ia ʻoku nau taukei he ngāue mo e kau toʻa ne ngaohikoviá mo kulukia tamakí.

ʻE tokoniʻi ʻe he Kau Taukei ki hoʻo Tuʻunga Leleí ʻa kinautolu ʻoku lesisita ke kau mai ki he Fakatotoló, poupouʻi, pea fokotuʻu atu ha ngaahi tokoni fakafeauloto mo e ngaahi tokoni kehe pē. ʻOku fakaʻaongaʻi ʻe he ʻIunití ha sīpinga ʻo e fepoupouʻaki ʻi he tokangá mo hono tataki ʻo e fealeaʻakí. ʻOku ʻuhinga eni ke fakafehokotaki ʻe he kau taukeí e kau toʻa ne ngaohikoviá, fāmilí mo kinautolu kotoa pē ʻoku kau atú, ki he ngaahi maʻuʻanga tokoní ke poupouʻi hono puleʻi e fetafeaki ʻa e fakamatalá ʻi he vahaʻa ʻo e Kau Fakatotoló, kau toʻa ne ngaohikoviá, mo ha toe ngaahi tokoni kehe pē ʻe fiemaʻu. ʻE faifeinga e Kau Taukei ki hoʻo Tuʻunga Leleí ke tauhi e ngaahi tefitoʻi moʻoni ʻo e tokangaekiná ʻoku fakatefito ʻi he ngaahi ʻulungaanga ʻo e ʻofá, tokangá, tauhi vaá mo hono fakapapauʻi ʻoku kau e malú mo e tokangá heʻemau ngaahi founga ngāué. Neongo pe ko e hā e puipuituʻa ʻo kinautolu ʻoku kau maí, ʻe ngāue ʻa e ʻIuniti ki hoʻo Tuʻunga Leleí mo koe, ko ho fāmilí pe kakai ʻoku nau poupouʻi koé ke fakapapauʻi ʻoku feau hoʻo ngaahi fiemaʻú.