Kanokato ʻo e Fakatotoló

Naʻe aofangatuku ʻa e Ngaahi Makatuʻunga Fekauʻaki maʻae Fakatotolo Tauʻatāiná ʻe he Kau Fakatotoló hili ha ngāue ne ʻomi ai ha ngaahi fakamatala tokoni mei he kau toʻa Kolisi Tutuku ne ngaohikoviá, kau mēmipa ʻo e fāmilí mo e komiunitī fakalukufua ʻo Tiliuefí. ʻOku ʻoatu ʻe he ngaahi makatuʻungá ʻa e taumuʻa ʻo e Fakatotoló, ko hono kanokató, mo e ngaahi founga ngāue ʻa e Fakatotoló mo e ʻaho ki hono tuku atu ʻo e lipooti ʻa e Fakatotoló.

ʻE vakaiʻi ʻe he Fakatotoló ʻa e natula mo e lahi ʻo e ngaohikovia fakasekisualé mo mafatukituki fakatuʻasino ʻo e fānau ako he ʻApiako Tiliuefí, mei he 1950 ki he ʻaho ʻe ngata ai e Fakatotoló. ʻOku kau ʻi he kanokato ʻo e Fakatotoló ʻa e:

Ngaahi makatuʻunga naʻá ne fakatupu pe tānaki atu ki he hoko ʻa e ngaohikovia fakasekisualé mo mafatukituki fakatuʻasino ʻo e fānau ako ʻo e ʻApiako Tiliuefí, ʻo kau ai e:
- ngaahi meʻa ne tupu mei hono faʻungá, ngaahi polokalamá, pe taufatungamotuʻá
- ngaahi ngāue ne fai pe taʻefai ʻe he ʻApiakó, ko hono kau talāsití mo e kau ngāué kae pehē foki ki ha taha pē ʻi hono fakahoko, fakaʻatā pe poupouʻi ʻo e ngaohikoviá
- fakatotoloʻi, fakahū mai, akoʻi, fakalakalakaʻi, fua fatongia, puleʻi, mo hono tokangaʻi e kau ngāué mo e niʻihi kehe ʻoku nau kau ʻi hono fakahoko e tokangaʻí pe tauhí;
- ngaahi tuʻutuʻuni mo e founga ngāue ʻa e ʻApiakó ne fakaʻatā atu ʻi he ngaahi taimi fekauʻakí ke ʻohake e ʻuuni meʻa ʻoku fai ki ai e tokangá, pe fakahoko ha ngaahi lāunga, fekauʻaki mo e ngaohikoviá;
- taufatungamotuʻa ʻo e ʻApiakó ʻi he ngaahi taimi fekauʻakí, ʻo kau ai e ngaahi ʻulungaanga ne fakangofua, fakaʻatā pe poupouʻi ʻi he vā ʻo e fānau ako ʻo e ʻApiakó.
ngaahi ngāue ne fai pe taʻefai ʻe he ʻApiakó, ko hono kau talāsití, ʻōfisá mo e kau ngāué ke tali, pe ngāue ki he ngaahi lāunga ʻa kinautolu ne ngaohikoviá ʻo kau ai:
- hono ʻiloʻi, pe totonu ke ʻiloʻi ʻe he niʻihi ko iá, ʻa e ngaohikovia naʻe hoko ʻi he ʻApiakó;
- e meʻa ne nau fai, kapau ne ʻi ai, ki ha faʻahinga lāunga pē ʻo e ngaohikoviá;
- pe naʻe ʻi ai ha ngaahi feinga ke fufū pe lōmia hono lipooti ʻo e ngaahi taimi ne hoko ai e ngaohikoviá;
- pe naʻe fenāpasi e tali ki he ngaahi lāunga ngaohikoviá (ʻo kau ai e fakafeaulotó mo e fakatonutonú) mo e ngaahi founga ngāue lelei ʻo e taimi ne hoko ai e ngaohikoviá.
ngaahi tuʻutuʻuni mo e founga ngāue lolotonga ʻa e ʻApiakó pe ʻoku feʻunga kakato ia ke maluʻi e moʻui lelei mo e tuʻunga lelei ʻo e fānau ako lolotongá mo e kahaʻú.

ʻE lava ke maʻu e aofangatuku ʻo e Ngaahi Makatuʻunga Fekauʻaki ʻo e Fakatotolo Tauʻatāina Tiliuefí ʻi hono lomi e fehokotakinga ko ení:

NGAAHI MAKATUʻUNGA FEKAUʻAKI ʻO E FAKATOTOLO TAUʻATĀINÁ

ʻE lava ke maʻu e aofangatuku ʻo e Ngaahi Makatuʻunga Fekauʻaki ʻo e Fakatotolo Tauʻatāina Tiliuefí ʻi he lea faka-Maulí ʻaki hoʻo lomi e fehokotakinga ko ení:

NGAAHI MAKATUʻUNGA FEKAUʻAKÍ ʻI HE LEA FAKA-MAULÍ

ʻOku mau kei fakatupulaki e ngaahi founga ngāue ke aʻusia ai e taumuʻa ʻo e Fakatotoló, ʻo hangē koia ʻoku hā ʻi he Ngaahi Makatuʻunga Fekauʻakí. ʻE ʻoatu e fakamatala fakamuimuitahá ʻi he uepisaiti ko ení ʻi hano aofangatuku e ngaahi ngāué ni. Lomiʻi heni kapau ʻokú ke loto ke ke ʻilo e ngaahi fakamatala fakamuimuitaha fekauʻaki mo e Fakatotolo Tauʻatāina Tiliuefí.