Te Kōrahi o te Whakatewhatewhatanga

He mea whakakōpani Ngā Tikanga Whakahaere o te Whakatewhatewhatanga Motuhake e ngā Kaiwhakatewhatewha i muri i tētahi tukanga whakahoki whakaaro i whai wāhi ai ngā tūora Tama o Mua, ngā mema whānau me te hapori whānui o Dilworth. Ko tā ngā tikanga he whakatakoto i te aronga o te Whakatewhatewhatanga, te kōrahi, ngā tukanga a te Whakatewhatewhatanga me te rā tuku i te pūrongo a te Whakatewhatewhatanga.

Mā te Whakatewhatewhatanga e arotake te āhua me te rangiwhāwhātanga o ngā pāwheratanga me ngā haupatutanga o ngā tauira o Te Kura o Dilworth, mai i 1950 ki te rā mutunga o te Whakatewhatewhatanga. Ka uru ki te kōrahi o te Whakatewhatewhatanga:

Ngā āhuatanga i hua ake ai, i tutungi rānei i te putanga o ngā pāwheratanga me ngā haupatutanga o ngā tauira o Te Kura o Dilworth, tae ana ki:
- ngā take ā-hanganga, ā-pūnaha, ā-ahurea rānei
- ngā mahi, ngā hapa rānei o te Kura, o ōna kaitiaki me ōna kaimahi tae ana ki ētahi atu tāngata i tā rātou karawhiu, whakaae, akiaki rānei i ngā tūkinotanga
- te aromātaitanga, te taritaritanga, te whakangungutanga, te whakawhanaketanga, te pai o ngā mahi, te whakahaeretanga me te hōmiromirotanga o ngā kaimahi, ā, o ētahi atu ko tā rātou he tauwhiro
- te wātea o ngā kaupapa here me ngā tukanga a te Kura i ngā wā hāngai hei whakaputa i ngā āwangawanga, hei tuku amuamu rānei e pā ana ki ngā tūkinotanga
- te āhua noho o te Kura i ngā wā hāngai, tae ana ki ngā momo whanonga i whakaaetia, i āheitia, i akiakitia rānei i waenganui i ngā tauira o te Kura.
ngā mahi me ngā hapa o te Kura, o ōna kaitiaki, o ōna āpiha me ōna kaimahi i tā rātou tuku urupare, kōrero rānei mō ngā amuamu tūkinotanga, tae ana ki:
- te mōhio rānei o taua hunga, i tōna tikanga rānei me mōhio, ki ngā tūkinotanga i puta i te Kura;
- ā rātou i mahi ai, mēnā i pērā, hei urupare ki ngā amuamu tūkinotanga;
- te whai kia hunaia, kia tārehutia rānei ngā mōhiotanga, ngā pūrongotanga rānei o ngā pānga tūkinotanga;
- te hāngai rānei o te urupare mō ngā amuamu tūkinotanga (tae ana ki te tauwhirotanga āwairua me te puretumu) ki ngā tikanga tūtika i te wā i puta ai te tūkinotanga.
ā te Kura kaupapa here, hātepe anō hoki o nāianei, ā, mēnā e tino rawaka ana ērā ki te tiaki i te hauora me te oranga o ngā tauira o nāianei, ā, o ngā tauira o āpōpō.

Kitea ai te kape mana o Ngā Tikanga Whakahaere o te Whakatewhatewhatanga Motuhake o Dilworth mā te pāwhiri i te hononga e whai ake nei:

NGĀ TIKANGA WHAKAHAERE O TE WHAKATEWHATEWHATANGA MOTUHAKE

Kitea ai te kape mana o Ngā Tikanga Whakahaere o te Whakatewhatewhatanga Motuhake ki Dilworth kua tuhia ki te reo Māori mā te pāwhiri i te hononga o raro nei:

NGĀ TIKANGA WHAKAHAERE I TE REO MĀORI

E whakawhanake ana mātou i ētahi tukanga e tutuki ai te aronga o te Whakatewhatewhatanga i tuhia rā i Ngā Tikanga Whakahaere. Ka whakahoungia ngā kōrero i tēnei pae tukutuku hei te whakatepenga o aua whakawhanaketanga. Pāwhirihia a konei mēnā kei te pīrangi kia whakamōhiohia koe e pā ana ki ngā whakahoutanga mō te Whakatewhatewhatanga Motuhake o Dilworth.