Ngā kokenga o nāianei
Nō te whakarewanga i te 1 o Hūrae 2022, e 219 tāngata kua rēhita i tō rātou ratanga ki te Whakatewhatewhatanga. Ka whai wāhi ki taua nama ko ngā tūora tama o mua e 143, me ngā tāngata e 76 (he whānau, he kaimahi o mua, he mema poari o mua rānei). Ā mohoa nei, kua uiuitia e tō mātou tīma ngā tāngata 90, ko te nuinga, he tūora tama o mua. E 18 anō ngā uiuitanga kua whakaritea ki te hiku o Ōketopa, ā, e whāwhai ana ki te whakaoti i ngā uiui tūora katoa. E aro ana hoki ki ngā uiuitanga me ngā kaihara, ngā kaimahi, ngā mema poari, me ētahi atu tāngata whai pānga. Nō mātou ka whakatū i ā mātou hātepe, kua noho mātāmua ngā tūora tama o mua me ō rātou oranga, ā, kua āta whai mātou ki te tautoko i a rātou i tā rātou whai wāhi ki te Whakatewhatewhatanga.
E koa ana mātou i te nui o te hunga kua whakapā mai, heoi anō, e pōuri ana hoki i ngā rārangi wheako kua tae mai ki a mātou.
Hei āpiti ake ki ā mātou mahi me ngā tāngata, kua kimihia, kua kitea, ā, e arotakehia ana hoki e mātou te tini puka e hāngai ana ki ā mātou tikanga whakahaere. Kua aroturuki hoki mātou i ngā taunakitanga kua tae ki te Kōmihana a te Karauna.
Nā te kaitā o ngā rēhitatanga i nui ake ai ngā rauemi a te Whakatewhatewhatanga e tutuki pai ai ngā mahi hei whakaoti i tā tātou pūrongo. Nā reira kua nui ake te nama kaimahi, ā, e whakamahia ana te hangarau hei āwhina i te tātaritanga o ngā mōhiohio kua tae mai ki a mātou.
Te whakaroa i te rā tuku pūrongo
E whakapāha ana mātou ina hoki nā ēnei tūāhuatanga i mate ai mātou ki te whakaroa i te rā tuku pūrongo i te Tīhema 2022 ki te tau e tū mai nei. E whai ana ināianei kia tukuna te pūrongo ā te 31 o Mei, 2023, ā, ko te rā whakamutunga, hei kāinga rua, ko te 31 o Akuhata, 2023. Kia mōhio mai koutou e mahi wawe ana, e mahi mahuki ana mātou. Ka whakamōhiohia koutou ki ngā kokenga hei te pane o te tau e tū mai nei.
Te pānga ki ngā puretumu
E kore tēnei e whai pānga ki ngā tama o mua kua tohu mai kia kaua e rēhita ki te Whakatewhatewhatanga, engari ki te Hōtaka Puretumu anake. Ka āhei tonu ngā Tama o Mua kua rēhita ki te Whakatewhatewhatanga me te Hōtaka Puretumu te tuku kerēme puretumu hei whakatau i mua i tā mātou tuku i tā tātou pūrongo. E ū ana mātou kia mahi tahi ki te hōtaka Puretumu e tutuki ai tēnei. Heoi anō, e mōhio ana mātou ka roa ake te wā tatari mō te hunga e tatari ana ki te pūrongo i mua i te tono puretumu. E whai whakaaro ana mātou ki tēnei tūāhuatanga, waihoki, e mihia ana te taumahatanga ka āpitihia ki runga ki a rātou.
He mihi
Kei te hia mihi mātou ki a koutou katoa kua rēhita mai ki te Whakatewhatewhatanga. E tino mihia ana ngā tūora tama o mua, ā, e whakamānawa ana i tō rātou kaha me tō rātou māia i roto i ā rātou whakawhiti kōrero ki a mātou. Kia mahara ake, e wātea ana te tīma oranga a te Whakatewhatewhatanga hei torotoro māu mā te hātepe Whakatewhatewhatanga. E taea ana hoki te rēhita ki te Ratonga Whakarongo o Dilworth e whai wāhi ai koe ki tētahi kaimātai hinengaro mō ngā tautoko wā-roa, ā, he utu-kore.
Me he pātai anō āu e pā ana ki tēnei karere, tēnā, īmērahia a [email protected].
Nā māua nei, nā
Dame Silvia Cartwright
Frances Joychild KC